Aug 29, 2011

kerrie

'n Paar weke terug, net nadat ek weer in Arkadia aangeland het, het ek besef dat daar dringende afleiding benodig gaan word in die tyd wat voorlê.  So ek het begin kerrie maak, lang, moeisame kerries uit Rick Stein se Far Eastern Odyssey, wat my hande besig hou en my kop dwing om oor ander dinge te dink.  Die opspoor van al die bestandele is opsigself 'n reuse afleiding – Stein se boek dek kos uit Kambodja, Vietnam, Thailand, Maleisië, Bali, Sri Lanka, en Bangladesh, en  die lysies bestandele vir elke dis is lank.  Vissous, palmsuiker, knoffel, gemmer, en tamarind paste.  Thai basilie, Vietnamese kruisement, grondboontjies, borrie, lemon grass, salotte, kaffir lemmetjieblare, vars klapper, gefermenteerde shrimp paste uit Kambodja.  En natuurlik rissies.  Baie rissies.  Vir die Thai kerries kom 'n reeks ander bestandele by – koljander en komyn, baie kardamom, naeltjies en kaneel en mace (die eerste keer wat ek dit ooit gebruik!).  As die bestandele uitgesorteer is het jy net tyd nodig.  Verkieslik oor 'n naweek, wanneer dit stil raak en jy nie paragrawe het om te skryf nie, en die hele huis lateraan ruik soos 'n speserywinkel.

 Ek begin met 'n resep uit Kambodja – Khmer varkkerrie, met klapper en pynappel.  Nie 'n besonder souserige kerrie nie, die klapper wat interessante dimensie verskaf aan hoe die geure ontwikkel.  Die vars pynappel verloor heeltemal sy soet element en word byna 'n groente, wat saam met klein, groen Thai eiervruggies die dis afrond.  Daarna skuif ek na Thailand vir 'n mussaman kerrie, maar kry nêrens die swart kardamom wat die kerrie blykbaar onweerstaanbaar maak in die hande nie, so dit bly daarsonder.  Bees stowevleis en aartappel is buiten die speserye die hoofkomponente hier, en dit word afgerond met Thai basilie en gekapte, geroosterde grondboontjies.  Daar was ook 'n slaai, afkomstig uit Vietnam, met hoender, salotte, Chinese kool, wortel en 'n verskeidenheid Vietnamese kruie (wat ek nie kon vind nie, en dus vervang het met wat hier beskikbaar is) en weereens die grondboontjies, en afgerond is met 'n slaaisous van vissous, lemmetjiesap, rice vinegar, en die ewig-teenwoordige knoffel en rissie.  Dit was leuk.

Daarna het ek vir 'n oomblik geskuif van Rick Stein na Maddur Jaffrey, en palak paneer gemaak.  Die paneer weet jul klaar van, en alhoewel die uiteindelike kerrie, vol garam masala en groot hoevelhede knoffel en gemmer lekker was, het ek my spinasie oorspronklik nie fyn genoeg gekap nie, en was die uiteindelike tekstuur van die kerrie nie heeltemal soos dit moes wees nie.  Meh.

Wat is jul geliefde kerries?  En wie kan my raad gee oor waar op aarde ek Thai basilie en Vietnamese kruisement kan vind?  The distraction continues.

5 comments:

Marlette said...

Hi Arcadia, ek het my Thai basil en mint plantjies by die Life Style Centre in Randburg gekoop, die Thai kruisement verrig wonders vir 'n mojito... Tans gebruik ek dit veel eerder as die meditireense weergawes.
Marlette

arcadia said...

Dankie, Marlette! Sal bietjie 'n plan maak om daar uit te kom.

Orchidhunter said...

Oe, Life Style is die beste! En dis definitief die moeite werd om jou eie Thai basil te kweek.

Anairam said...

My lekkerste kerrie is Lemeez wat in dieselle gebou as ek gewerk het se twee resepte - een wat sy net Maleise kerrie noem en die ander een is haar butter chicken resep en die spices en goeters daarvoor het sy self vir my gekoop by die spesery winkel in Kenilworth Centre waar sy hare koop. Sy het haarself oor my ontferm toe sy hoor hoe ek kerrie maak, dis nou Afrikaanse kermiskerrie, met mince, Rajah kerriepoeier, dessicated coconut en 'n banana daaroor opgesny.

Marisa said...

Ek stem - die maklikste is om 'n kwekery te besoek en Thai basil en vietnamese mint plantjies daar op te spoor en dit dan by jou huis te kweek vir toekomstige kerries - dit groei heel maklik, selfs vir 'n tuinmaak idioot soos myself.