Dec 13, 2010

Dis Kersfees in Arcadia! Deel 3: Speseryneute

Ons onderbreek die koekie line-up om jou te vertel dat dit tyd is om met heel nuwe oë na neute te kyk.  Om die seisoen te omhels en hul te laat glinster in bietjie botter, bruinsuiker en speserye.  Hierdie speseryneute is wat alle neute wil wees as hul eendag groot is. 

Die kombuis is (alweer) in 'n toestand.  Tussendeur die bak van nog koekies het ek pas meer as 'n kilogram neute gerooster in die oond, en baie, baie amper als verbrand.  Op hierdie stadium van die Kersfeesvoorbereiding voel dit asof ek nooit in besit van genoeg neute sal wees nie – ek gaan kort-kort winkel toe vir nog.  Maar in alle geval.  Buiten die amper noodlottige roosterproses van die neute, rooster ek ook komyn.  Dit word fyngestamp en gemeng met cayenne pepper en kaneel.  Intussen word die geroosterde neute gedompel in 'n groot pot waarin 'n paar eetlepels botter gesmelt is, en na 'n minuut of so voeg jy 'n paar eetlepels bruinsuiker, jou speserye, en sout by.  En dis dit.  As al die neute bedek is tiep jy die pot uit op 'n gesmeerde oondplaat, en laat hul afkoel.  Myne gaan verpak word in groot glasbottels, en dan afgepiekel Kaap toe.  Dis nou as ek dit regkry om nie helfte van hul te eet nog voor ons vertrek nie. 

Ns: Die resep is hier, as jul belangstel.

0 comments: