Sep 29, 2010

basil pesto en sampioen lasagne

Vandat die weer bietjie warmer is verkoop een van my gunsteling groenteverkopers by die Boeremark weer reuse bosse basil elke Saterdagoggend. Wat beteken dat ek deesdae omtrent elke week 'n potjie basil pesto maak. Ek gebruik wat ook al in die huis is – macadamianeute of kasjoeneute die laaste paar weke, maar ongelukkig nooit dennepitjies nie. Die goed is wragtag net te duur. Parmesaan is ook gewoonlik bo my budget, en ek vervang dit heel gelukkig met pecorino. Daarby saam natuurlik olyfolie en knoffel, en dit bly absoluut skokkend hoeveel meer vibrant so varsgemaakte bakkie pesto proe as die gebottelde weergawe.

Dis 'n koeler dag, en vir aandete layer ek die pesto saam met gebraaide sampioene en bechamelsous tussen lae lasagnevelle, die idee gesteel uit Nigel Slater se immergroen Kitchen Diaries. Bo-op nog 'n smackering fyn-gerasperde pecorino. Bak.

2 comments:

Marisa said...

Tuisgemaakte pesto is definitief in 'n ander klas as die winkel weergawes.

arcadia said...

Absoluut.