Jul 29, 2009

swart gevaar

Hier was 'n gebrek aan brood in die huis en ek het iets nodig gehad om my aandag af te lei, en so gebeur dit toe dat ek 'n Saterdagaand spandeer aan die bak van 'n Russiese swartbrood, wat ek op Smitten Kitchen gesien het. Die brood het 'n aardige lang lys van bestandele wat gewoonlik nie in brood te siene is nie, als van donker, onversoete sjokolade en shallots en espressopoeier en molasse tot drie verskillende tipes meel*. Die eindproduk was lekker, maar nie so wonderlik soos ek gehoop het nie. Dit was effe droog, en die geur van die verskillende elemente het nie sterk genoeg ontwikkel nie. Ek mag dit volgende keer langer los om te rys as wat die resep vermeld, wat gewoonlik die truuk doen. Maar daar's steeds iets wonderliks daaraan om op 'n Sondagoggend wakker te word en 'n vars tuisgebakte brood in die huis te hê, en het die swartbrood uiteindelik geëet saam met dun slivers gerookte salm**, en 'n skeppie suurroom.

* Ek het pas die wonderlike Eureka Mills ontdek, en hul rogmeel is nog die billikste wat ek in Pretoria kon opspoor. Daar is 'n lys van winkels in die stad wat hul produkte aanhou op hul webwerf.

** En tot my groot vreugde het ek nou 'n plek ontdek wat goedkoop (baie goedkoop) gerookte salm verkoop hier in die stad. The catch? Dis in Pretoria-Wes, en jy moet beide Bloed- en Proesstraat aandurf om daar uit te kom.

1 comments:

The Electric Orchid Hunter said...

Bloedstraat is die lelikste plek in die hele stad.

Hoe lus het ek nou vir 'n sny rogbrood.